श्री.दत्त नाटक मंडळ ने उचलला खारीचा वाटा

 श्री.दत्त नाटक मंडळ ने उचलला खारीचा वाटा

         आपल्या गावातील व्यक्तींनी एक आदर्श आपल्या समोर ठेवला आहे .आपण फक्त त्यांच्या कार्याला उजाळा देत आहोत. मग ते धोंडीराम पाटील असो ,नामदार पठाण असो ,विश्वनाथ कराड गुरुजी असो ,गोदावरीबाई तोतला असो ,नाथा गुरुजी असो,बाबुराव फुंदे असो ,दत्तोपंत कुलकर्णी असो, असे अनेक चांगले लोक आपल्या गावात होऊन गेले . त्यांनी जे कार्य केले आहे ते खरच स्तुती करण्यासारखे आहे . ही फक्त सुरवात आहे .बाकीच्या लोकांचे कार्य व त्यांची नावे हळू हळू पुढील लेखातून येणार आहे. 

      आपल्या गावात  महात्मा गांधी विद्यालय आले खरे. पण या शाळेचा सुरवातीचा काळ  कस होता ..? गावात शाळा आल्या नंतर नेमक काय काय घडलं . त्यातीलच एक छोटासा किस्सा. आज आपल्या बरोबर शेअर करत आहे. महात्मा गांधी विद्याल्याची स्थापना ही 1960 साली आपल्या गावात झाली . सुरवातीला फक्त इ.8 वी. च्या वर्गाची सुरवात झाली होती. सर्व मुलं हे या शाळेत शिकू लागली होती. त्यावेळेस महात्मा गांधी विद्याल्याचा हा इ 8 वी.चा वर्ग गावच्या चावडी मध्ये भरत होता.आज जी शाळेची इमारत आहे ना तशी सुरवातीच्या काळात नव्हती. या वर्गाला शिकवण्यासाठी दोन शिक्षकांची म्हणजे केकाण_सर आणि दांडगे_सर यांची नेमणूक संस्थेने केली होती .केकान सर हे शेवगाव जवळील एरंडगावाचे . शाळेच्या सर्व कारभार पाहण्याची जवाबदारी ही संस्थेने त्यांच्यावर सोपवली होती .थोडक्यात तेच शाळेचे मुख्याध्यापक होते .सुरवातीला एकच वर्ग असल्यामुळे दोन शिक्षकच सर्व विषय शिकवत असे.

       गावाच्या चावडी मध्ये भरणारी ही शाळा .शाळाचे पुढील वर्ग आणण्यासाठी शाळेला जागा व कमीत कमी दोन तीन वर्ग खोल्या असाव्या असा विचार होऊ लागला .म्हणून शाळेच्या बांधकामासाठी गावकऱ्यांनी वर्गणी करायचे ठरवले.वर्गणीतून जो पैसे जमा होईल त्यातून शाळेच्या वर्ग खोल्याचे बांधकाम करू असे ठरले .सर्व स्थरातून वर्गणी जमा करण्याचे काम सुरू झाले . त्या वेळेस आपल्या गावात एक नाटक मंडळ होते . कदाचित हे बऱ्याच जणांना  माहित नसेल .त्या नाटक कंपनीचे नाव होते श्री_दत्त_नाटक_मंडळ. डॉ.बाबूलाल पाटील यांनी आपल्या मित्रांना सोबत घेऊन या नाटक मंडळाची स्थापना केली होती. बाबूलाल पाटील हे एक उत्तम लेखक , अभिनेता , वादक आणि दिगदर्शक होते. त्यांनी आपल्या मित्रांना बरोबर घेऊन शाळेच्या मदतीसाठी एक नाटक बसूया असे त्यांनी ठरवले .आता नेमकं नाटक कोणते बसायचे...? या वर खुप विचार झाला .शेवटी  त्यांनी एक नाटक निवडले.त्या नाटकातील  दानशूर पणा पाहून लोकांनी शाळेसाठी काही तरी दान दिले पाहिजे असा त्याचा हेतू होता . त्या नाटकाचे नाव होते राजा हरिश्चंद्र.  

           बाबूलाल पाटील यांनी ते नाटक खूप सुंदर रित्या बसवले .त्यामध्ये राजा हरिश्चंद्रची भूमिका स्वतः बाबूलाल पाटील यांनी केली. राजा हरिश्चंद्र च्या बायकोची म्हणजे तारामतीची भूमिका उत्तम बडे यांनी केली होती , विश्वमित्राची भूमिका आश्रूबा_बडे यांनी केली होती.तर लहान रोहिदासाची भूमिका बाबूलाल पाटील यांचे लहान भाऊ  बाबासाहेब पठाण यांनी केली होती. या नाटकात बिशनलाल_बैरागी, बाजीराव_बडे, सारंगधर_सोनार , कोळसंगीचे कुसळकर,इ .अनेक कलाकार या नाटकात होते.असं म्हणतात हे नाटक पाहण्यासाठी त्या काळात  तीन ते चार हजार लोक जमा झाले होते. नाटक एवढे चांगले झाले की,नाटक  पाहुण प्रेक्षकांच्या डोळ्यातून अक्षरशः अश्रू आले होते . असा जीवंत अभिनय नाटकात सर्व कलाकारांनी केला होता . नाटक संपल्या नंतर श्री.दत्त नाटक मंडळाला  दोन_ग्लास_बक्षीस देण्यात आले. या नाटकाच्या माध्यमातून जी रक्कम जमा झाली .ती सर्व शाळेच्या बांधकाम साठी शाळेचे शिक्षक केकाण सर व दांडगे सर यांच्या कडे देण्यात आली. त्यानंतर या नाटकांने आपल्या पंचकृषित खूप नाव कमवले .या नाटक मंडळाने अनेक नाटक नंतर बसवली . नाटक मंडळाने केलेल्या या चांगल्या कार्याची दखल दुसऱ्या दिवशी वर्तमान पत्राने घेतली .शेवटी शाळेच्या बांधकामासाठी गावातील श्री.दत्त नाटक मंडळाने पण खारीचा वाटा उचलला.

✍🏻 तनवीर पठाण सर✍🏻

   मो.न.8380937788

     लेख क्रमांक 05